"Насаф" жамоаси бугун, яъни 20 июль куни Тошкентда йиғинни бошлашади. Улар эртага Наманганнинг "Навбаҳор" жамоаси билан назорат учрашувини ўтказишади. Биз жамоа бош мураббийи Рўзиқул Бердиев билан боғланиб, кейинги ўзгаришлар ҳақида ҳам сўрадик.

"Жамоамиз бугун кечга Тошкент шаҳрига ташриф буюришади. Давралараро ўқув-йиғин машғулотлари қисқа муддатда у ерда давом эттирилади. Эртага биз "Навбаҳор" жамоаси билан назорат учрашуви ўтказамиз. Учрашув ЖАРдаги машғулотлар майдонида бўлиб ўтади. Бошланиш вақтини ҳозирча кеч соат 18:00га келишганмиз. Шу учрашувдан сўнг қисқа танаффус қиламиз ва асосий тайёргарликни Тошкентда "Пахтакор" жамоаси билан бўлиб ўтадиган Ўзбекистон Кубоги ярим финалининг дастлабки учрашувига тайёргарликни бошлаймиз.

Жамоамиз таркибидаги ўзгаришларга тўхталадиган бўлсам, дарвозабонимиз Ғайратжон Ҳасанов бундан буён Фарғонанинг "Нефтчи" жамоаси аъзосига айланиши деярли ҳал бўлган. Шунингдек, ярим ҳимоячимиз Мирзакамол Камолов ҳам "Нефтчи" сафида шуғулланиб турибди, унинг бу жамоа билан шартнома тузиш ёки тузмаслиги ҳозирча аниқ эмас.

Ўзларингизга маълум яна бир ўйинчимиз Элдор Бойматов Зарафшоннинг "Қизилқум" жамоасида машғулотларни давом эттирмоқда. Сафимизга келиб қўшиладиганларга тўхталадиган бўлсам, муқаддам жамоамиз сафида тўп тепган Самандар Шодмонов ҳозирги кунда биз билан бирг,а яъни кўрикдан ўтмоқда, унинг ҳозирча жамоа сафида қолиш ёки қолмаслиги ҳақида бир қарорга келганимиз йўқ. Бундан ташқари асосий таркибга ўринбосарларимиздан икки ўйинчини қўшиб олиш ниятимиз бор, булар кимлар бўлишини кейинроқ сизларга маълум қиламиз", - дейди "Насаф" футбол жамоаси бош мураббийи Рўзиқул Бердиев.