"Барселона" хавбеки Френки де Йонг клубдаги келажаги ҳақидаги саволга жавоб берди.
Ўтган ойда 28 ёшли футболчи каталонияликлар билан шартномасини 2029 йилгача узайтирганди.
"Аниқ билмайман, лекин "Барселона"да яна кўп йиллар ўтказишимни тўлиқ тахмин қиламан. Бу ерда менга жуда қулай. Ўйлайманки, бизда яхши жамоа бор, келажагимиз порлоқ кўринади. Клубда мени қадрлашларини ҳис қиляпман. Биз оиламиз билан бахтлимиз ва мен узоқ вақт қолишдан мамнун бўлардим, лекин ҳаммаси қандай бўлишини кўрамиз. Буни вақт кўрсатади," - деди нидерландиялик журналистлар билан суҳбатда.
Френки де Йонг 2019 йилдан бери "кўк-анорранглилар" шарафини ҳимоя қилиб келмоқда. Аввалроқ, ярим ҳимоячи ўз ватанида Амстердамнинг "Аякс" жамоасида ўйнаган.
