Польшалик ҳужумчи Роберт Левандовски “Барселона” билан янги шартнома имзоламаса, футболчилик фаолиятини якунлаши мумкин. Бу ҳақда Sport.es нашри хабар берди.

Унинг каталонияликлар билан шартномаси 2025/26-йилги мавсум якунига қадар амал қилади. 37 ёшли форвард “Барселона”да қолишни хоҳламоқда ва имкон бўлса, захира футболчиси сифатида ўйнашга ҳам тайёр. Аммо клуб ҳужумчи билан шартнома узайтириш борасида бир қарорга келмаган. Агар “кўк-анорранглилар” раҳбарияти футболчи билан янги битим имзоламаса, шунингдек, бошқа жамоалардан тушган таклифлар қониқтирмаса, Левандовски фаолиятини якунлаш вариантини кўриб чиқади.

Хабарларга кўра, тажрибали ҳужумчи Саудия Арабистони клубларидан молиявий яхши таклифлар олган, бироқ Роберт Европада қолиб, фаолиятини шу ерда давом эттиришни истамоқда.

Аввалроқ “Барселона” раҳбарияти футболчининг ёши, самарадорликнинг пасайгани ҳамда жамоавий прессингда аввалгидек фаоллик кўрсата олмаслиги сабабли шартномани узайтириш ниятида эмаслиги ҳақида хабар берилганди.

Маълумот учун, жорий мавсум Левандовски “Барселона” сафида жами 12 ўйинда майдонга тушиб, ўз ҳисобига 7 та гол ёздириб қўйган. У  Ла Лига доирасидаги охирги учрашувда “Сельта” дарвозасига 3 та гол уриб (4:2), хет-трик муаллифига айланди.

Эслатиб ўтамиз, полшалик футболчи 2022 йил ёзида “Бавария”дан “Барселона” сафига 45 миллион евро эвазига ўтган эди. У каталонияликлар билан икки марта Ла Лига чемпиони бўлди, шунингдек, Испания кубоги ва икки марта Суперкубокни қўлга киритди.