Polshalik hujumchi Robert Levandovski “Barselona” bilan yangi shartnoma imzolamasa, futbolchilik faoliyatini yakunlashi mumkin. Bu haqda Sport.es nashri xabar berdi.

Uning kataloniyaliklar bilan shartnomasi 2025/26-yilgi mavsum yakuniga qadar amal qiladi. 37 yoshli forvard “Barselona”da qolishni xohlamoqda va imkon bo‘lsa, zaxira futbolchisi sifatida o‘ynashga ham tayyor. Ammo klub hujumchi bilan shartnoma uzaytirish borasida bir qarorga kelmagan. Agar “ko‘k-anorranglilar” rahbariyati futbolchi bilan yangi bitim imzolamasa, shuningdek, boshqa jamoalardan tushgan takliflar qoniqtirmasa, Levandovski faoliyatini yakunlash variantini ko‘rib chiqadi.

Xabarlarga ko‘ra, tajribali hujumchi Saudiya Arabistoni klublaridan moliyaviy yaxshi takliflar olgan, biroq Robert Yevropada qolib, faoliyatini shu yerda davom ettirishni istamoqda.

Avvalroq “Barselona” rahbariyati futbolchining yoshi, samaradorlikning pasaygani hamda jamoaviy pressingda avvalgidek faollik ko‘rsata olmasligi sababli shartnomani uzaytirish niyatida emasligi haqida xabar berilgandi.

Ma’lumot uchun, joriy mavsum Levandovski “Barselona” safida jami 12 o‘yinda maydonga tushib, o‘z hisobiga 7 ta gol yozdirib qo‘ygan. U  La Liga doirasidagi oxirgi uchrashuvda “Selta” darvozasiga 3 ta gol urib (4:2), xet-trik muallifiga aylandi.

Eslatib o‘tamiz, polshalik futbolchi 2022 yil yozida “Bavariya”dan “Barselona” safiga 45 million yevro evaziga o‘tgan edi. U kataloniyaliklar bilan ikki marta La Liga chempioni bo‘ldi, shuningdek, Ispaniya kubogi va ikki marta Superkubokni qo‘lga kiritdi.