Лондоннинг “Челси” клуби “Комо” ярим ҳимоячиси Нико Пасни трансфер қилиш имкониятларини кўриб чиқмоқда. Бу ҳақда Caught Offside нашри хабар берди.

21 ёшли аргентиналик футболчининг қиймати яқин йиллар ичида 100 миллион еврога етиши тахмин қилинмоқда. Мазкур ҳолат ортидан лондонликлар Пасни ўз сафига қўшиб олишни истамоқда.

Аммо Пасни трансфер қилиш жараёнида Мадриднинг “Реал” клуби муаммо туғдириши ёки тўсқинлик қилиши мумкин, чунки футболчи айнан шу клуб тарбияланувчиси ҳисобланади. “Қироллик клуби” ярим ҳимоячини 2026-йилда 9 миллион евро, 2027-йилда эса 10 миллион евро эвазига сотиб олиш ҳуқуқига эга. Шунингдек, “Интер” клуби аргентиналикка 58 миллион евролик таклиф тайёрлаётгани айтилмоқда.

Шунингдек, футболчининг атрофидаги вазиятини “Арсенал” ҳамда “Тоттенҳэм” ҳам жиддий қизиқиш билан кузатмоқда. “Шпорлар” ёзги трансфер ойнаси пайтида Никога таклиф жўнатган эди, аммо “Комо” раҳбарияти Лондон клубининг таклифини рад этган.

Жорий мавсумда Пас барча мусобақалар доирасида жами 12 та ўйинда майдонга тушиб, 4 та гол ва 4 та голли узатма муаллифига айланган. Унинг клуб билан амалдаги шартномаси 2028 йил ёзигача мўлжалланган. Transfermarkt портали маълумотига кўра, футболчининг бозор қиймати 55 миллион еврони ташкил этади.