Шу кунларда пойтахт вилоятининг Қизилтоғ шаҳарчасида ўқув-машғулот йиғинини давом эттираётган “Қизилқум” футболчилари йиғин доирасидаги илк ўртоқлик учрашувида майдонга тушди.
 
Режага кўра, дастлабки синов назорат баҳси Тошкентнинг “Бунёдкор” ёшларига қарши ўтказилди. Унда зарафшонликлар бош мураббийи Рустам Забиров ўз ихтиёридаги футболчиларнинг барчасини майдонга туширди. Кончиларнинг тўлиқ устунлигида кечган ўйинда “Қизилқум” жамоаси 5:2 ҳисобида зафар қучди. Голларни биринчи бўлимда зарафшонликлардан Никита Павленко (иккита), Александр Лупашко киритган бўлса, танаффусдан кейин қолган икки голга Темур Васильев ҳамда Ғуломҳайдар Ғуломов муаллифлик қилди.
 
Биринчи бўлимда Забиров қуйидаги таркибни синовдан ўтказди: Эркин Жабборов, Жалил Кимсанов, Темур Яфаров, Файзулла Қамбаров, Рустам Аъзамов, Никита Павленко, Андрей Власичев, Элдор Бойматов, Исроил Эргашев, Собир Усмонхўжаев, Александр Лупашко.

Иккинчи бўлимда улар ўз ўрнини қуйидаги футболчиларга бўшатиб беришди: Элдор Тожибоев, Темур Айзатулов, Дониёр Усмонов, Фаррух Нурлибоев, Суннатилла Тошпўлатов, Сергей Рекун, Фарруҳ Ҳайдаров, Ғуломҳайдар Ғуломов, Сарваржон Холматов, Темур Васильев, Наврўзбек Алимов.
 
Мавсумнинг иккинчи ярмида ўз олдига ҳужумкор ва чиройли ўйин намойиш этишни мақсад қилиб қўяётган зарафшонликлар таркибига янги футболчилар келиб қўшилмоқда. Жумладан, куни кеча Забиров ихтиёрига Тошкентнинг “Пахтакор” жамоасидан Сергей Рекун етиб келди.
 
Режага мувофиқ, бугун-эрта “Қизилқум” жамоаси ўқув-машғулот йиғинига Грузия, Украина, Латвия, Россиядан легионер футболчилар келиб қўшилади.
 
Эслатиб ўтамиз, Рустам Забиров шогирдлари навбатдаги ўртоқлик учрашувини 24 июль куни ўтказади. Унда кончилар  Наманганнинг “Навбаҳор” футболчиларига қарши майдонга тушадилар.