"Интер Майами" ҳужумчиси Лионель Месси Аргентина терма жамоасининг Анголага қарши ўртоқлик ўйинида гол урди.
38 ёшли футболчи беллашувнинг 82-дақиқасида рақиб дарвозасини ишғол қилди ва таблода якуний ҳисобни ўрнатди - 2:0. Inter Miami News Hub хабарига кўра, Месси бир календарь йилида фаолиятида 11 марта 45 ва ундан ортиқ гол урган тарихдаги иккинчи футболчи бўлди. Биринчи бўлиб бу натижани Криштиану Роналду забт этганди.
Лионель Месси 2005 йилда дебют қилганидан бери Аргентина терма жамоаси сафида 196 та ўйинда 115 та гол урган. Яқинда у 29 та аниқ зарба билан MLS мунтазам чемпионатининг энг яхши тўпурари бўлди.













