"Палермо" бош мураббийи Женнаро Гаттузо келажакда фаолиятининг энг яхши йиллари кечган "Милан" клубини бошқариш истагида эканлигини яширмади.
- Кунлардан бир куни "Милан"ни бошқаришимни хоҳлаётганимни айтмасам - ёлғончи бўлиб қоламан, - дея Гаттузонинг сўзларини келтиради Republic. - Аммо ҳозирда "Палермо"да қиладиган ишларим жуда кўп, шунинг учун яқин орада "қизил-қоралар" ўриндиғида ўтирмасам керак. Ҳозир бу ҳақида ўйламасликка ҳаракат қиляпман. Дзамприни билан муносабатларим жуда яхши, ўйлайманки, у билан ҳамкорлигимиз узоқроққа чўзилади. Ҳозир менинг ўй-хаёлларим "В" серияда ғолиб чиқишга қаратилган. Бу менинг энг асосий мақсадим.
Эслатиб ўтамиз, Гаттузо "Палермо" рулига июнь ойи ўрталарида келиб ўтирди. Бунгача Швейцариянинг "Сьон" клубида ўйновчи мураббий бўлиб ишлаган.