"Реал" футболчиси Килиан Мбаппенинг адвокати Дельфин Верхейден судда "ПСЖ"га қарши янги айбловлар билан чиқди ва клуб Саудия клубининг таклифини футболчидан яширганини ва шартнома бўйича музокаралар чоғида унга босим ўтказганини айтди.
Ҳуқуқшуноснинг сўзларига кўра, Мбаппе 2023 йилнинг 12 июнидаёқ клубни электрон почта орқали шартномани икки йилдан ортиқ муддатга узайтирмоқчи эмаслиги ҳақида огоҳлантирган. Бироқ, "ПСЖ"дагилар, Верхейденнинг айтишича, унинг позициясини жиддий қабул қилишмаган ва барчаси пулга боғлиқ деб ўйлашган. Шунингдек, у 2023 йилнинг 21 июлида Мбаппе таркибдан четлатилганидан кейин клуб томонидан босим фақат кучайганини эслатди: футболчига янги шартнома имзоламасдан майдонга тушмаслигини тушунтиришган.
Адвокат Саудия Арабистони таклифи билан боғлиқ вазиятга алоҳида эътибор қаратди. 22 июль куни клублардан бири Мбаппе учун 300 млн евро тўлашга тайёр эди ва таклиф 25 июль ярим тунгача амал қилди. Бироқ, Верхейденга кўра, бу таклиф ҳужумчига етказилмаган.
