Дортмунднинг "Боруссия" клуби ҳужумчиси Карим Адейеми келаси йилнинг ёзида жамоасини ўзгартиришга тайёр.

Германиялик футболчи ҳозирги клубида сўнгги мавсумини ўтказаётган бўлиш эҳтимоли юқори. Bild маълумотларига кўра, Адейеми аллақачон карьерасини давом эттиришнинг турли вариантларини ўрганмоқда. Маълумки, яқинда 23 ёшли форварднинг агенти "Манчестер Юнайтед" билан музокара ўтказган ва "Милан" ҳам футболчи ҳақида маълумот сўраган эди.

Transfermarkt портали талқинига кўра, Карим Адейемининг нархи 60 млн еврони ташкил этади. Жорий мавсумда немис барча турнирларда "асаларилар" сафида 14 та ўйинда 3 та гол урди ва шунча голли узатмани амалга оширди.