Бугун "Насаф" клуби ОФК Элит Чемпионлар Лигаси мусобақасининг 5-тури доирасида Эроннинг "Трактор" жамоаси билан куч синашади.
Келинг, ушбу жамоа ҳақида бироз тўхталамиз.
"Трактор" жамоаси 55 йиллик тарихга эга. Клуб 1970 йилда ташкил этилган.
Жамоага мухлислар томонидан "Red wolves" (қизил бўрилар) деган лақаб берилган.
"Трактор" ўз уй учрашувларини Табриз шаҳрида жойлашган "Ядегар-э Эмам" стадионида ўтказади. Ушбу майдон 80 мингдан зиёд мухлисни ўз бағрига сиғдира олади.
Жамоа 2 карра Ҳазфи кубоги мусобақасида ва яна 1 бор мамлакат Суперкубоги ғолиби ҳисобланади. 2024/2025 йилги мавсум якунида эса ўз тарихида биринчи маротаба Эрон Гулф-Про лигасида чемпион бўлди.
"Трактор" шу вақтгача Осиё Футбол Конфедерацияси томонидан ўтказилган расмий мусобақаларда 52 та ўйин ўтказган. Улардан 15 тасида ғалаба, 20 тасида мағлубият, 17 тасида эса дуранг натижа қайд этилган.
Жамоани айни пайтда 57 ёшли хорватиялик мутахассис Драган Скочич бошқармоқда. У ўз фаолияти давомида "Ан-Наср", "Ал-Араби", "Фулад" каби Осиёнинг номдор клубларида ишлаган. 2020 йилдан 2022 йилгача Эрон терма жамоасига устозлик қилган.
Мураббий "Трактор" жамоаси билан ўтган мавсум жамоа тарихида биринчи бор мамлакат чемпионлигини қўлга киритди. Шунингдек, Эрон Суперкубогини ҳам қўлга киритди.
Жамоа таркибида айни пайтда Даниал Исмаэилфар, Шожаи Халилзода, Алиреза Байранванд, Амирҳусайн Ҳусайнзода каби Эрон терма жамоаси футболчилари тўп тепишмоқда.
Ушбу клуб Ўзбекистон миллий терма жамоаси футболчилари учун ҳам бегона эмас. Айни вақтда "Трактор" сафида Ўзбекистон терма жамоаси аъзоси Одил Ҳамробеков фаолият олиб бормоқда.
Эслатиб ўтамиз, ОФК Элит Чемпионлар Лигаси 5-туридан ўрин олган "Насаф" – "Трактор" учрашуви 24 ноябрь куни соат 18:45 да старт олади.
