«Бавария» ҳужумчиси Харри Кейн Чемпионлар Лигаси умумий босқичи 5-туридан ўрин олган «Арсенал»га қарши ўйиндаги мағлубият (1:3) ҳақида фикр билдирди.

«Бу оғир ўйин бўлди, биз бундан бошиданоқ хабардор эдик. Биринчи таймда яхши кураш бўлди, ўйин ҳам анча тенг кечди. Иккинчи бўлимда эса энергия ва интенсивлигимизни йўқотдик, жуда кўп яккакурашларда ютқаздик. Бу мавсумдаги биринчи мағлубиятимиз. Тушкунликка тушишга ҳожат йўқ, аммо хулосаларни албатта чиқарамиз.

Рақиб биринчи ва иккинчи тўплар учун курашда устун келди. Стандартлар — бу борада улар хавфли эканини билардик. Ишончим комилки, Чемпионлар Лигасининг кейинги босқичларида яна «Арсенал» билан тўқнаш келамиз. Улар майдон бўйлаб персонал таъқибни амалга оширишди. Айтганимдек, бу ҳолда ҳаддан ташқари хавотирга ўрин йўқ. Биз «Челси», «ПСЖ» ва «Арсенал»га қарши сафарда ўйнадик. Ва ўйинларнинг кўпини ғалаба билан якунладик», — дея Кейиннинг сўзларини BBC келтиради.

Ҳозирги вақтда «Арсенал» 15 очко билан Чемпионлар Лигаси турнир жадвалида якка лидерга айланган. Жамоа «ПСЖ», «Бавария», «Интер» ва «Реал»дан 3 очкодан олдинда бормоқда.