"Кристал Пэлас" марказий ҳужумчиси Жан-Филипп Матета бир неча клублар эътиборига тушди. Бу ҳақда нуфузли инсайдер Фабрицио Романо маълум қилди.

Манбага кўра, Франция терма жамоаси форварди А Серия ва АПЛ клублари қизиқишлари доирасига тушиб қолган. Италия жамоалари орасида Матетага "Милан" даъвогарлик қилаётгани маълум. "Россонерилар" қишки трансферлар вақтида "Кристал Пэлас"га расмий таклиф билан чиқиши мумкин.

Матета "бургутлар" сафида 2022 йилдан буён тўп тепиб келмоқда. Жорий мавсумда 28 ёшли футболчи 21 та ўйинда майдонга тушиб, 8 та гол урди ва 2 та голли узатмани амалга оширди. Transfermarkt портали французни 35 млн еврога баҳоламоқда.