"Барселона" ўз майдонида Ла Лиганинг шанба кунги баҳсида "Алавес"ни мағлуб этди (3:1). Бу "кўк-анорранглилар"нинг янгиланган "Камп Ноу"даги иккинчи ўйини эди. Маркус Рэшфорд жамоа ўз ўйингоҳига қайтганидан кейин биринчи учрашувни ўтказиб юборганди, бу сафар эса иккинчи бўлим бошланишидан олдин захирадан майдонга тушди.
"Барселона" футболчиси сифатида "Камп Ноу"даги илк ўйиним. Бу мен учун ўзгача оқшом," - деб ёзди "Манчестер Юнайтед"дан ижарага олинган 28 ёшли англиялик футболчи ижтимоий тармоқда.
2 декабрь куни Ханс-Дитер Флик жамоаси ўз майдонида яна бир ўйин ўтказади - рақиб чемпионатда кетма-кет олтита ғалабага эришган Мадриднинг "Атлетико" клуби бўлади.
