Мадриднинг "Реал" клуби сафарлар сериясини якунлади. "Қаймоқранглилар" кетма-кет олтита сафар ўйинини ўтказди, улардан охиргиси Бильбаонинг "Атлетик" клубига қарши кечди ва 3:0 ҳисобида ғалаба қозонди. Якшанба куни мадридликлар ўз уйида "Сельта"ни қабул қилади.
"Кетма-кет олтита сафар ўйинидан сўнг "Бернабеу"га қайтиш жуда ёқимли бўлади. Бунақаси камдан-кам бўлади ва биз аллақачон стадионимизни, мухлисларни ва уларнинг қўллаб-қувватлашини соғиняпмиз", - дея Алонсонинг сўзларини келтиради Madrid Universal.
"Реал" Ла Лига 15-туридан кейин 36 очко билан 2-ўринда бормоқда.
