Саудия Арабистони Про-лигаси клублари "Ливерпуль" суперюлдузи Муҳаммад Салоҳга қизиқишини янгиламоқчи эканлиги ҳақида хабарлар тарқалган.
33 ёшли футболчи жорий мавсумни ёмон бошлади, бу унинг кетиши ҳақидаги миш-мишларнинг янгиланишига сабаб бўлди. Салоҳ бу мавсумда барча мусобақаларда 15 та ўйинда атиги бешта гол урди ва учта голли узатмани амалга оширди ҳамда бир неча бор захирадан майдонга туширилди.
TalkSPORT хабарига кўра, Саудия Арабистони Про-лигаси клублари ёзда Салоҳни сотиб ололмаганидан сўнг, мисрлик футболчига қизиқишини янгиламоқчи.
"Ал-Ҳилол" Салоҳни сотиб олишга энг кўп қизиқаётган клуб деб ҳисобланмоқда, "Ал-Қодисия" ҳам унинг вакиллари билан боғланган.
Ҳужумчи илгари 500 миллион фунт стерлинглик таклифни рад этган, аммо унинг "Ливерпуль" билан амалдаги шартномаси тугашига атиги бир йил қолганлиги сабабли, ёзги трансфер эҳтимоли кўпроқ бўлади.
