"РБ Лейпциг"нинг 19 ёшли вингери Ян Диоманде Европанинг етакчи клублари радарига тушиб қолди.
Журналист Экрем Конурнинг ёзишича, "Ливерпуль" ва "Манчестер Сити" Диоманденинг ҳаракатларини диққат билан кузатиб бормоқда. Шунингдек, ёш истеъдодга "Арсенал", "Челси", "Бавария", "ПСЖ", "Барселона" ва "Реал" клублари қизиқиш билдирмоқда.
Ўтган дам олиш кунлари Диоманде "Айнтрахт" дарвозасига хет-трик қайд этди. Германия чемпионатининг 13-туридан ўрин олган ўйин "РБ Лейпциг"нинг 6:0 ҳисобидаги ғалабаси билан якунланди ва Диоманденинг ўзи 1965 йилдан бери Бундеслигада хет-трик қайд этган энг ёш футболчига айланди.
Умуман олганда, бу мавсумда ҳужумчи барча мусобақаларда 15 та ўйинда майдонга тушиб, еттита гол урди ва тўртта голли узатмани амалга оширди.
Transfermarkt мутахассислари ивуарлик футболчининг нархини 20 миллион еврога баҳоламоқда.
