"Манчестер Сити" бош мураббийи Хосеп Гвардиола Нико О'Райлининг ўйини ҳақида қандай фикрда эканини айтди. Чоршанба куни 20 ёшли футболчи Чемпионлар лигаси доирасида Мадриднинг "Реал" клубига қарши ўйинда гол урди. Учрашув 2:1 ҳисобида "шаҳарликлар"нинг ғалабаси билан якунланди ва ёш инглизга беллашувнинг энг яхши футболчиси соврини топширилди.
"Нико жуда яхши. Афтидан, у ҳозирда Англия терма жамоасининг асосий чап қанот ҳимоячиси. Унинг ақл бовар қилмайдиган тезлиги бор, у ақлли. Тўғри, баъзида хатолар бўлиб туради, лекин у ҳаракат қилади ва бу ажойиб натижа беради," - деди Гвардиола ўйиндан кейинги интервьюсида.
"Манчестер Сити" сафидаги иккинчи гол Эрлинг Холанд томонидан пенальтидан киритилди. "Реал" сафида Родриго гол урди.
