"Реал" вазиятни ўнглаш учун бош мураббий Хаби Алонсога яна учта ўйин берди.

44 ёшли баск Чемпионлар лигаси умумий босқичининг 6-туридан ўрин олган "Манчестер Сити"га қарши ўйинда мағлубиятга учраган тақдирда истеъфога чиқарилиши мумкинлиги хабар қилинганди. "Қаймоқранглилар" кеча ўз уйида 1:2 ҳисобида имкониятни бой бериб қўйди.

Бироқ, АS хабарига кўра, "Мадрид" раҳбарияти мураббийга натижаларни яхшилаш учун кўпроқ вақт беради. Хаби келажагига жорий йилги Ла Лига ва Испания Кубогининг учта ўйини таъсир қилиши мумкин - "Алавес" (14 декабрь), "Талавера" (17 декабрь) ва "Севилья" (20 декабрь).

Клуб "Ман Сити"га қарши ўйинда "Реал"нинг ўйинида ижобий ўзгаришлар бўлганини таъкидлади, аммо мағлубият ва мухлисларнинг ҳуштакбозлиги "қаймоқранглилар" раҳбарларини қониқтирмади.

Таъкидланишича, Алонсога ультиматум қўйилмаган, аммо жамоанинг муваффақиятсиз ўйинлари мураббий фойдасига бўлмаган қарор қабул қилинишига таъсир қилиши мумкин. Агар хўжайинларни хавотирга солаётган вазият ўзгармаса, у январь ойидаёқ қабул қилиниши мумкин.