Франциялик ҳимоячи Дайо Упамекано Мюнхеннинг "Бавария" клубида қолиши мумкин. Бу ҳақда Kicker хабар бермоқда.
Манбага кўра, Упамекано вакиллари ўзларининг барча талабларини "Бавария" раҳбариятига етказган. Таъкидланишича, футболчи шартномани узайтиргани учун бонус олмоқчи. Умуман олганда, у фаолиятини "Бавария"да давом эттиришга тайёр, аммо фақат ўз шартлари асосида. Энди гап клубда: ё раҳбарият Упамеканонинг талабларини қабул қилади, ёки у мавсум охирида текинга кетади.
Жорий мавсумда 27 ёшли Упамекано барча мусобақаларда 20та ўйинда майдонга тушиб, битта гол уришга муваффақ бўлди. Transfermarkt портали мутахассислари ҳимоячининг нархини 60 миллион еврога баҳоламоқда.
