"Барселона" президенти Жоан Лапорта судда Хосе Мария Энрикес Негрейра ва унинг ўғли билан шахсан таниш эмаслигини айтди.

Бу ҳақда Лапортанинг "Негрейра иши" бўйича эълон қилинган кўрсатмаларидан маълум бўлди.

Лапортанинг сўзларига кўра, у 2003 йилда клуб президенти этиб сайланганидан кейин ҳакамлик ҳисоботларини тайёрлайдиган компанияга тўловлар ҳақида билган, бироқ унинг эгаси ким бўлганини унга айтишмаган.

"Мен Энрикес Негрейра билан шахсан таниш эмасдим. Менга ҳакамлик бўйича маслаҳат хизмати мавжудлигини айтишди ва биз унинг хизматларидан фойдаланишда давом этдик, чунки биз буни фойдали деб топдик.

Гап шундаки, 18 йил давомида 7,3 миллион евро тўланган. Келинг, буни контекстда кўриб чиқамиз. Бу спорт соҳаси учун муҳим ва фойдали бўлган хизматлар учун унчалик қиммат эмас деб ўйлайман.

Менга маълумки, жаноб Негрейранинг ўғли ҳисоботлар тайёрлаган, жаноб Негрейра ўтмишда судья бўлган. Бу мен билган ягона нарса", - деди Лапорта.