"Манчестер Сити" ҳужумчиси Омар Мармуш терма жамоасининг муваффақиятига ишонмоқда. 26 ёшли футболчининг фикрича, мисрликлар нафақат қитъа миқёсида, балки бўлажак мундиалда ҳам зафар қучишга қодир.
"Биз Африка Миллатлар Кубогида, кейин эса жаҳон чемпионатида ғалаба қозонамиз. Таркибимизнинг кучи ва тайёргарлик даражасини ҳисобга олган ҳолда айтиш мумкинки, терма жамоамиз Африкадаги энг яхшиси," - дея Мармушнинг сўзларини келтиради The Touchline.
Африка кубоги баҳслари 21 декабрдан 18 январга қадар бўлиб ўтади. Миср терма жамоаси ЖАР, Ангола ва Зимбабве терма жамоалари билан бир гуруҳда иштирок этади.
Жаҳон чемпионати 2026 йилнинг 11 июнидан 19 июлига қадар бўлиб ўтади. Мисрликларнинг гуруҳдаги рақиблари Бельгия, Эрон ва Янги Зеландия терма жамоалари ҳисобланади.
