"Ботафого" жамоа бош мураббийи Давиде Анчелотти билан ҳамкорликни якунлаганини маълум қилди.

Жамоани унинг штаби вакиллари - жисмоний тайёргарлик бўйича мураббий Лука Герра, шунингдек, унинг ёрдамчилари Луис Тевенет ва Эндрю Манган ҳам тарк этди.

Globo нашрининг ёзишича, Карло Анчелоттининг ўғли бразилияликларга Герранинг истеъфоси сабаб фаолиятини давом эттирмаслигини маълум қилган.

Давиде Анчелотти бутун мураббийлар штаби сақланиб қолган тақдирдагина клубда қолишини айтди, "Ботафого" бунга рози бўлмади.

Қайд этилишича, ўтган мавсумда "Ботафого" футболчилари мушакларида кўплаб жароҳатлар бўлган. Манбаларнинг таъкидлашича, Бразилия футболининг тиғиз ва сермазмун тақвимига баъзан мос келмайдиган машғулотларнинг юқори шиддати ҳақида шикоятлар билдирилган.

Давиде Анчелотти "Ботафого"га 2025 йилнинг июлидан буён устозлик қилиб келмоқда. У жамоа бош мураббийи сифатида 33 та ўйин ўтказиб, 15 та ғалаба, 10 та дуранг ва 8 та мағлубият қайд этган. Клуб ўтган мавсумни 38 ўйинда 63 очко жамғариб, чемпионатда 6-ўринда якунлади.