"Botafogo" jamoa bosh murabbiyi Davide Anchelotti bilan hamkorlikni yakunlaganini ma’lum qildi.

Jamoani uning shtabi vakillari - jismoniy tayyorgarlik bo‘yicha murabbiy Luka Gerra, shuningdek, uning yordamchilari Luis Tevenet va Endryu Mangan ham tark etdi.

Globo nashrining yozishicha, Karlo Anchelottining o‘g‘li braziliyaliklarga Gerraning iste’fosi sabab faoliyatini davom ettirmasligini ma’lum qilgan.

Davide Anchelotti butun murabbiylar shtabi saqlanib qolgan taqdirdagina klubda qolishini aytdi, "Botafogo" bunga rozi bo‘lmadi.

Qayd etilishicha, o‘tgan mavsumda "Botafogo" futbolchilari mushaklarida ko‘plab jarohatlar bo‘lgan. Manbalarning ta’kidlashicha, Braziliya futbolining tig‘iz va sermazmun taqvimiga ba’zan mos kelmaydigan mashg‘ulotlarning yuqori shiddati haqida shikoyatlar bildirilgan.

Davide Anchelotti "Botafogo"ga 2025 yilning iyulidan buyon ustozlik qilib kelmoqda. U jamoa bosh murabbiyi sifatida 33 ta o‘yin o‘tkazib, 15 ta g‘alaba, 10 ta durang va 8 ta mag‘lubiyat qayd etgan. Klub o‘tgan mavsumni 38 o‘yinda 63 ochko jamg‘arib, chempionatda 6-o‘rinda yakunladi.