Мадриднинг "Реал" клуби ҳужумкор ярим ҳимоячиси Франко Мастантуоно майдонга деярли тушмай қўйди.
18 ёшли футболчи шанба куни "Севилья"га қарши кечган ва 2:0 ҳисобидаги ғалаба билан якунланган ўйинда ҳам захирада қолдирилди. Сўнгги вақтларда матбуотда аргентиналик футболчи ижарага кетиши мумкинлиги ҳақида миш-мишлар тарқалмоқда, аммо футболчининг ўзи кетмоқчи эмас. Marca хабарига кўра, Мастантуоно "қаймоқранглилар"нинг асосий таркибдаги ўрнини йўқотганидан хавотирда эмас. Вундеркинд мураббий Хаби Алонсонинг ишончини қайтариш учун курашни давом эттиришга бел боғлаган.
"Реал" жорий йилнинг ёзида Франко Мастантуонони сотиб олган эди. Испанияга кўчиб ўтишдан олдин у ўз ватанида "Ривер Плейт"да ўйнаган.
