Қозоғистоннинг "Актобе" клуби Европа лигаси саралашининг учинчи босқичида Исландиянинг "Брейдаблик" клубини қабул қилди ва қийин ғалабага эришди.

Темур Кападзе актобеликлар сафида ўйинни бошланғич таркибда бошлади. У биринчи бўлимда ўта фаол ўйнаб, "Актобе"нинг ҳам ҳимоявий, ҳам ҳужумкор ҳаракатларида асосий ролни бажарди. Бироқ дастлабки 45 дақиқаликда ҳисоб очилмади.

Александр Гейнрих эса 73-дақиқада захирадан майдонга тушди. У жамоанинг ҳужумдаги ҳаракатларини кучайтирди. Асосий вақтнинг энг сўнгги дақиқасида исландиялик ҳимоячи ўз жарима майдончаси ичида тўп билан ҳаракатланаётган Гейнрихни чалиб йиқитди. Чехиялик ҳакам иккаланиб ўтирмай пеналльти белгилади. 11 метрли зарбани Марат Хайруллин амалга оширди. Тўп рақиб дарвозабони қўлига тегиб, дарвоза бурчагига бориб тушди.

Ўйин давомида "Актобе" жамоаси катта ташаббусга эга бўлди. "Брейдаблик" ҳимоячилари ва дарвозабони бекорга Европа лигасининг 4та баҳсида ўз дарвозаси дахлсизлигини сақлаб қолмаётганини исботлади. Ўз навбатида уларнинг кам сонли ҳужумлари хавфли бўлди. Шундай зарбаларнинг бирини Кападзе дарвоза чизиғи устидан қайтариб қолди.

Жавоб ўйини 8 август куни Исландияда бўлиб ўтади.