Ҳужумчи Никлас Фюллькруг "Милан" аъзосига айланишга яқин турибди. Таниқли журналист Фабрицио Романонинг ижтимоий тармоқларда маълум қилишича, "Милан" ва "Вест Хэм" келаси ҳафтадаёқ келишувни ёпишни режалаштирмоқда.
Шу тариқа, Фюллькруг "Милан" сафига январь ойининг бошида, А Серияда қишки трансферлар ойнаси очилганда келиб қўшилиши мумкин бўлади. "Россонерилар" февраль ойида 33 ёшга тўладиган германиялик футболчини ижарага олмоқда.
Италия чемпионатида "Милан" навбатдаги ўйинини 28 декабрь куни ўз майдонида "Верона"га қарши ўтказади. Айни пайтда Массимилиано Аллегри жамоаси жадвалда 2-ўринни эгаллаб турибди.













