"Барселона" йилни сафарда "Вильярреал" устидан қозонилган ғалаба билан якунлади (2:0). "Кўк-анорранглилар" ҳисобида 2025 йилда барча турнирларда жами 169 та гол бор - бундан бор-йўғи тўрт марта кўпроқ гол урилган, тўрттаси ҳам "Месси даври"да қайд этилган, деб хабар беради Opta. Рекорд кўрсаткич 2015 йилда қайд этилган - 180 та гол. 2012 йилда жамоа 175 та, 2016 йилда 174 та, 2011 йилда 170 та гол уришга муваффақ бўлди.
Эслатиб ўтамиз, Лионель Месси 2021 йилнинг ёзида Каталония клуби сафини тарк этиб, эркин агент сифатида "ПСЖ"га ўтган эди. Айни пайтда аргентиналик футболчи "Интер Майами" шарафини ҳимоя қилмоқда.
"Барселона" Ла Лиганинг жорий мавсумида 46 очко билан пешқадамлик қилмоқда. Чемпионатнинг 18 ўйинида Ханс-Дитер Флик жамоаси рақиблар дарвозасини 51 марта ишғол қилди - энг яқин таъқибчиси бўлган "Реал"дан 15 та кўп гол урди.
