Бразилиялик мураббий Зико ижтимоий тармоқ орқали (Фейсбук) келаси ҳафта Қатарнинг "Ал-Ғарафа" клуби билан шартнома имзолаши ҳақида хабар тарқатди. У сўнгги марта 2012 йилнинг ноябрига қадар Ироқ миллий терма жамоасида ишлаганди. 

"Мен шанба куни Қатарга учиб бораман. "Ал-Ғарафа" билан оғзаки ва электрон почта орқали келишувга эришдим. Мен сўнгги шартларни келишиш ва шартнома имзолаш учун Доҳага бораман. Мен янги таклифдан ҳайратга тушдим, аммо музокараларнинг қолган қисмини шартнома имзолаганимдан кейин маълум қиламан", дейди Зико.

Зиконинг таъкидлашича, ушбу жамоа билан музокаралар 2012 йилнинг сўнгидан бошланган. Бироқ у пайтда Зико Ироқ терма жамоасини бошқараётгани учун таклифни қабул қилмаганди. Ноябрь ойида эса ойлик маошларнинг тўлови чўзилиб кетгани учун у Ироқни тарк этганди.

Зико ўз фаолияти давомида "Бунёдкор"да ҳам қисқа муддат ишлаб кетганидан хабарингиз бор.