«Монако» клуби Франция Кубоги доирасидаги ўйинда жароҳат олган япониялик ҳужумчи Такуми Минаминонинг оғир шикастланиши ҳақида расман маълум қилди.

Расмий баёнотга кўра, 30 ёшли футболчида чап тиззасининг олдинги кесишма боғлами узилиши юз берган.

Жароҳат якшанба куни Франция Кубогида «Осер»га қарши ўтказилган ва «Монако»нинг 2:1 ҳисобидаги ғалабаси билан якунланган учрашувда юзага келган. Минамино биринчи бўлимда рақиб билан кескин тўқнашувдан сўнг шикастланди, эпизод япониялик футболчига огоҳлантириш берилиши билан якунланди. Ўйинни давом эттира олмаган Минамино майдонни замбилда тарк этди.

Учрашувдан кейин «Монако» бош мураббийи Себастьен Поконьоли Минамино зудлик билан тиббий текширувдан ўтиш учун шифохонага юборилганини маълум қилди. Мураббийлар штаби хавотирлари эртаси куни тасдиқланди — клуб олдинги кесишма боғлами узилганини расман эълон қилди.

Ушбу жароҳат «Монако» учун ҳам, Япония терма жамоаси учун ҳам жиддий йўқотиш ҳисобланади, айниқса жаҳон чемпионатига олти ойдан сал кўпроқ вақт қолганини инобатга олганда. Жорий мавсумда Минамино «Монако» сафида барча мусобақаларда 21 та ўйин ўтказиб, 4 та гол урди ва 3 та голли узатма берди. Энди у мавсумнинг қолган қисмини ва, эҳтимол, 2026 йилги жаҳон чемпионатини ҳам ўтказиб юбориши кутилмоқда.

Япония терма жамоаси сафида Минамино 73 та ўйин ўтказиб, 26 та гол муаллифи бўлган.