Осиё футбол конфедерацияси (ОФК) кеча Элит ОЧЛнинг финал босқичига мезбонлик қиладиган Жидда шаҳридаги 2 та стадион номини эълон қилди. Мусобақа 2026 йил 16–25 апрель кунлари ўтказилади.

2025 йилги Элит ОЧЛ финал босқичига ҳам мезбонлик қилган "Қирол Абдуллоҳ Спортс Сити" ҳамда "Шаҳзода Абдуллоҳ ал-Файсал Спортс Сити" яна бир бор 2025/26 йилги мавсумнинг ҳал қилувчи етти учрашувини ўзида қабул қилади.

Марказлашган ушбу ўзига хос форматда Осиёнинг энг кучли саккиз клуби бир ўйинлик баҳсларда ўзаро тўқнаш келади. Чорак финал учрашувлари 16–18 апрель кунлари бўлиб ўтади, ярим финаллар 20 ва 21 апрель саналарига белгиланган, мусобақанинг ҳал қилувчи финали эса 25 апрель куни ўтказилади.

Лига босқичидан кейин икки ўйиндан иборат 1/8 финал баҳслари ўтказилади. Ғарб минтақаси учун учрашувлар 2–3 март ва 9–10 март кунлари, Шарқ минтақаси учун эса 3–4 март ва 10–11 март саналарида бўлиб ўтади. Шундан сўнг, 25 март куни мусобақада қолган саккиз клуб ўртасида қуръа ташланиб, Элит ОЧЛ финал босқичидаги жуфтликлар аниқ бўлади.