Ўзбекистон миллий терма жамоаси ва “Пахтакор” ҳужумчиси Игор Сергеев клубни тарк этиб, Эроннинг “Сепаҳон” жамоаси билан шартнома имзолаши кутилмоқда. Бу ҳақда журналист Нарзулла Сайдуллаев ўзининг Telegram каналида маълум қилди.

Маълумот учун, Сергеев Суперлиганинг 2025 йилги мавсуми тўпурари бўлди. 32 ёшли футболчи чемпионат давомида 20 та гол ҳамда 2 та голли узатма муаллифига айланди.

Эътиборлиси, Игор Сергеев орадан 10 йил ўтиб, яна Суперлига тўпурари бўлишга муваффақ бўлди. У 2015 йилда 24 та гол билан мавсумнинг энг яхши тўпурари сифатида эътироф этилганди.

Футболчи фаолияти давомида 5 карра Ўзбекистон чемпионига айланган. Шунингдек, у “Пахтакор” билан 3 марта Ўзбекистон кубогини ҳам қўлга киритган. Кейинчалик, фаолиятини Қозоғистоннинг “Тобол” клубида давом эттирган ва ушбу жамоа билан мамлакат чемпионати ва кубогида ғалаба қозонган.

Айни вақтда, Эрон Про лигасида 3 нафар ўзбекистонлик футболчи — Жалолиддин Машарипов (“Истиқлол”), Остон Ўрунов (“Персеполис”) ва Одилжон Ҳамробеков (“Трактор”) фаолият юритмоқда.

Transfermarkt нашри маълумотларига кўра, Игор Сергеевнинг айни вақтдаги трансфер нархи 1,2 миллион еврони ташкил этади.

“Сепаҳон” клуби Эрон Про лигасининг жорий мавсумида 14 та ўйиндан сўнг 30 очко жамғарган ва мусобақа пешқадами бўлиб турибди.