"Милан" ҳужумчиси Кристофер Нкунку қишки трансферлар даврида жамоани тарк этиши мумкин. Бу ҳақда инсайдер Николо Скира хабар бермоқда.
Манбага кўра, "Милан" франциялик ҳужумчининг ўйинларидан норози ва агар яхши таклиф тушса, уни сотиб юбориш масаласини кўриб чиқишга тайёр. Таъкидланишича, Нкункунинг итальян клубидаги маоши йилига беш миллион еврони ташкил этади.
Жорий йилнинг ёзида "Милан" Нкункуни "Челси"дан 37+5 млн еврога сотиб олганди. "Россонерилар" таркибида ҳужумчи барча мусобақаларда 14 та ўйинда майдонга тушиб, битта гол урди ва иккита голли узатмани амалга оширди.
