«Манчестер Сити» ҳужумчиси Эрлинг Холанд X ижтимоий тармоғидаги саҳифасида тарозида турган оёқлари акс этган суратни эълон қилди.

«Ҳаммаси жойида!» — деб ёзди норвегиялик футболчи.

Илгарироқ «шаҳарликлар» бош мураббийи Хосеп Гвардиола Рождество байрамлари давомида футболчиларнинг вазнини назорат қилишини маълум қилган эди. Мутахассис таъкидлашича, ортиқча вазн тўплаган футболчилар Англия чемпионати доирасида 27 декабрь куни бўлиб ўтадиган «Ноттингем Форест»га қарши учрашувга олиб кетилмайди.

Жорий мавсумда Холанд барча мусобақаларда 23 та ўйинда қатнашиб, 25 та гол урди ва 4 та голли узатма амалга оширди. Футболчининг клуб билан амалдаги шартномаси 2034 йил ёзигача мўлжалланган. Transfermarkt портали маълумотларига кўра, Холанднинг бозор қиймати 200 миллион еврога тенг.