«Manchester Siti» hujumchisi Erling Xoland X ijtimoiy tarmog‘idagi sahifasida tarozida turgan oyoqlari aks etgan suratni e’lon qildi.

«Hammasi joyida!» — deb yozdi norvegiyalik futbolchi.

Ilgariroq «shaharliklar» bosh murabbiyi Xosep Gvardiola Rojdestvo bayramlari davomida futbolchilarning vaznini nazorat qilishini ma’lum qilgan edi. Mutaxassis ta’kidlashicha, ortiqcha vazn to‘plagan futbolchilar Angliya chempionati doirasida 27 dekabr kuni bo‘lib o‘tadigan «Nottingem Forest»ga qarshi uchrashuvga olib ketilmaydi.

Joriy mavsumda Xoland barcha musobaqalarda 23 ta o‘yinda qatnashib, 25 ta gol urdi va 4 ta golli uzatma amalga oshirdi. Futbolchining klub bilan amaldagi shartnomasi 2034 yil yozigacha mo‘ljallangan. Transfermarkt portali ma’lumotlariga ko‘ra, Xolandning bozor qiymati 200 million yevroga teng.