"Кристал Пэлас" бош мураббийи Оливер Гласнер клуб билан шартномани узайтиришни режалаштирмаяпти.

Австрияликнинг "бургутлар" билан амалдаги меҳнат шартномаси 2026 йилнинг ёзида тугайди, бироқ мутахассис келишувни узайтириш бўйича музокаралар олиб бормоқчи эмас, деб хабар беради нуфузли инсайдер Фабрицио Романо.

Оливер Гласнер 2024 йилнинг февралида "Кристал Пэлас"ни қабул қилиб олганди. 51 ёшли мураббий қўл остида лондонликлар Англия кубоги ва мамлакат Суперкубоги ғолиби бўлишди. Айни пайтда жамоа Премьер-лига турнир жадвалида саккизинчи ўринни эгаллаб турибди.

Англияга кўчиб ўтишдан олдин Гласнер Франкфуртнинг "Айнтрахт" клубида ишлаган ва у билан Европа Лигасида ғалаба қозонган.