"Лацио" шарафини ҳимоя қилаётган португалиялик ҳимоячи Нуну Тавареш фаолиятини "Ал-Иттиҳод" клубида давом эттириши мумкин. Саудияликлар 25 ёшли футболчига жиддий қизиқиш билдирмоқда ва уни қишки трансферлар даврида ўз сафига қўшиб олмоқчи. Таниқли журналист ва инсайдер Экрам Конур Х ижтимоий тармоғида Тавареш аллақачон "Ал-Иттиҳод"га ўтишга розилик берганини маълум қилди.
"Лацио" ҳимоячи учун клубдан камида 20 млн евро талаб қилмоқда, бу сумма "Ал-Иттиҳод" учун муаммо бўлмаслиги керак. Томонлар ўртасидаги музокаралар якуний босқичда ва Тавареш янги йилни янги клубида бошлашга яқин турибди.
2023 йилнинг ёзида Нуну Тавареш Лондоннинг "Арсенал" клубидан 5 миллион евро эвазига "Лацио" билан шартнома имзолади. Жорий мавсумда ҳимоячи "бургутлар" сафида 10 та ўйинда майдонга тушди ва 1 та голли узатмани амалга оширди. Таварешнинг "бургутлар" билан шартномаси 2029 йилгача мўлжалланган. Transfermarkt маълумотларига кўра, унинг бозор қиймати 15 млн еврони ташкил этади.
