Жума куни Премьер-лига доирасидаги "Манчестер Юнайтед" - "Ньюкасл" учрашуви бўлиб ўтди ва унда "қизил иблислар" минимал ҳисобда ғалаба қозонди.
Рубен Аморим жамоасига уч очкони 24-дақиқада ҳимоячи Патрик Доргунинг аниқ зарбаси келтирди. Opta хабарига кўра, "Манчестер Юнайтед" 2022 йилнинг март ойидан бери биринчи марта Премьер-лигада Бруну Фернандешсиз ғалаба қозонишга муваффақ бўлди. 45 ой муқаддам Ральф Рангник бошчилигидаги манкунианликлар "Тоттенхэм"ни португалиялик футболчисиз мағлуб эта олганди (3:2). Ҳозирги сардор йўқ бўлган кейинги олтита ўйинда атиги бир очко (дуранг ва бешта мағлубият) тўпланган.
Фернандеш "Астон Вилла" билан ўтган ўйинда жароҳат олганди, у январь ойининг иккинчи ярмида сафга қайтиши режалаштирилган.
