"Ливерпуль" ва "Вулверхэмптон" клубларининг марҳум собиқ ярим ҳимоячиси Диогу Жотанинг фарзандлари АПЛнинг 18-туридан ўрин олган жамоалар ўртасидаги ўйин олдидан ўтказилган маросимда иштирок этишди.
Футболчининг фарзандлари Динис ва Дуарте ҳамда оиланинг бошқа аъзолари футболчиларни ўйинга олиб чиқишди. Ўйин Ливерпулдаги "Энфилд" стадионида бўлиб ўтмоқда.
3 июль куни Испанияда 28 ёшли Жота ва унинг 25 ёшли укаси ЙТҲда ҳалок бўлди. Қувиб ўтиш вақтида машинанинг ғилдираги ёрилиб кетган, шундан сўнг футболчи бошқарувни йўқотган.
Жота "Ливерпуль" сафида 2020 йилдан буён тўп тепиб келаётганди. Бунгача у "Вулверхэмптон," "Атлетико," "Порту" ва "Пасуш Феррейра" клубларида ўйнаган.
