Нигерия терма жамоаси устози Эрик Шелль Африка Миллатлар Кубоги доирасида Тунисга қарши ўйинни сарҳисоб қилди. Гуруҳ босқичининг 2-тур ўйини 3:2 ҳисобида унинг шогирдлари ғалабаси билан якунланди.
Нигерия узоқ вақт давомида 3:0 ҳисобида олдинда борди. Чарчоқ, баҳсли пенальти ва дарвозабоннинг хатоси натижасида нигерияликлар 74 ва 87-дақиқаларда гол ўтказиб юборди.
"Сўнгги 15 дақиқа ёки шунга яқин вақт мени даҳшатли тушларда таъқиб қилади. Бўлаётган воқеалардан бироз ақлдан озаётгандим. Бу Тунисдек катта жамоага қарши синов эди. Тунис жаҳон чемпионати саралаш ўйинларида бирорта ҳам гол ўтказиб юбормади. Бундай терма жамоага қарши 3 та гол! Мен учун бу ажойиб ўйин. 70 дақиқа давомида тўпни яхши ушлаб турдик", - дея Шеллнинг сўзларини келтиради RFI.
Нигерия сешанба куни гуруҳдаги сўнгги ўйинида Уганда билан, Тунис эса Танзания билан куч синашади.
