"Манчестер Сити" бош мураббийи Хосеп Гвардиола АПЛ 18-туридан ўрин олган "Ноттингем Форест"га (2:1) қарши сафар ўйинида мухлисларга миннатдорчилик билдираётган вақтда йўлини тўсган телеоператорнинг хатти-ҳаракатидан норози бўлди.
Испаниялик мутахассис трибуна томон юрар экан, "Сити Граунд" стадионида камера ушлаган одамнинг хатти-ҳаракатларига ҳиссиёт билан муносабат билдирди. Гвардиола кўзларини ола-кула қилиб, операторга қўлини чўзди. Кейин у икки қўлини шиддат билан силкитиб, Sky Sports ходими четга чиқиб, унинг йўлини бўшатиши кераклигини кўрсатди. Оператор жойини ўзгартиргач, Гвардиола меҳмонлар трибунасига яқинлашиб, мухлислар билан ғалабани нишонлади.
18 ўйин натижасига кўра, Гвардиола жамоаси 40 очко билан АПЛ турнир жадвалида 2-ўринда бормоқда. Лондоннинг "Арсенал" клуби 42 очко билан пешқадамлик қилмоқда.
