Мюнхеннинг "Бавария" клуби чемпионатдаги голлари сони бўйича топ-5 лига клублари орасида етакчилик қилмоқда, деб ёзади Opta.

Немис клуби 2025 йилда Бундеслигада 107 та гол урди, бу Европанинг бешта етакчи чемпионатлари орасида энг яхши натижадир. Ушбу кўрсаткич бўйича ҳам рекорд Мюнхен жамоасига тегишли бўлиб, 2021 йилда ўрнатилган. Ўшанда "Бавария" 116 та гол урганди.

Жорий мавсум Германия чемпионатида ўтказилган 15 ўйиндан сўнг "Бавария" очколарини 41тага етказиб, энг яқин таъқибчиси Дортмунднинг "Боруссия"сини 9 очкога ортда қолдирган ҳолда пешқадамлик қилмоқда. Чемпионлар Лигасида мюнхенликлар олти ўйиндан кейин 15 очко билан турнир жадвалида иккинчи ўринда бормоқда.