Қатарнинг Доҳа шаҳрида шахматнинг блиц йўналишидаги жаҳон чемпионати бошланди. Мусобақанинг биринчи кун доирасида эркаклар 13 та, аёллар эса 10 та ўйин ўтказишди.

Аёллар турнирида Умида Омонова бугун жуда яхши натижа қайд этди. У 10 имкониятдан 8 очко тўплаган ҳолда 3-ўринда бормоқда. Иккинчи ўриндаги Александра Горячкина ҳисобида ҳам шунча очко бор. Нидерландиялик Элина Ройберс эса 8,5 очко билан пешқадамлик қилмоқда. Умида 11-турда айнан Ройберсга қарши ўйнайди.

Эркаклар ўртасидаги мусобақанинг биринчи кунидан кейин ўзбекистонликлар орасида Нодирбек Абдусатторов энг яхши натижа қайд этмоқда. У 13 имкониятдан 9 очко жамғариб, 10-ўринда бормоқда. Абдусатторов эртага 14-турда ҳиндистонлик Нараянанга қарши дона суради.

Жавоҳир Синдаров эса 8,5 очко билан 25-поғонани эгаллаб турибди. Жавоҳирнинг эртанги илк баҳси арманистонлик Арам Хакобянга қарши бўлади.

Бугун Абдусатторов ва Синдаров 12-турда ўзаро тўқнаш келиб, дуранг қайд этишганини таъкидлаш лозим.

Эркаклар мусобақасида жами 19 та тур ўтказилади ва энг яхши натижа қайд этган 4 шахматчи медаллар учун курашда иштирок этади: ярим финал ва финал.

Аёллар турнирида эса 15 та турдан кейин 4 шахматчи чемпионлик ва совринли ўринлар учун кураш олиб боради.