Qatarning Doha shahrida shaxmatning blis yo‘nalishidagi jahon chempionati boshlandi. Musobaqaning birinchi kun doirasida erkaklar 13 ta, ayollar esa 10 ta o‘yin o‘tkazishdi.

Ayollar turnirida Umida Omonova bugun juda yaxshi natija qayd etdi. U 10 imkoniyatdan 8 ochko to‘plagan holda 3-o‘rinda bormoqda. Ikkinchi o‘rindagi Aleksandra Goryachkina hisobida ham shuncha ochko bor. Niderlandiyalik Elina Roybers esa 8,5 ochko bilan peshqadamlik qilmoqda. Umida 11-turda aynan Roybersga qarshi o‘ynaydi.

Erkaklar o‘rtasidagi musobaqaning birinchi kunidan keyin o‘zbekistonliklar orasida Nodirbek Abdusattorov eng yaxshi natija qayd etmoqda. U 13 imkoniyatdan 9 ochko jamg‘arib, 10-o‘rinda bormoqda. Abdusattorov ertaga 14-turda hindistonlik Narayananga qarshi dona suradi.

Javohir Sindarov esa 8,5 ochko bilan 25-pog‘onani egallab turibdi. Javohirning ertangi ilk bahsi armanistonlik Aram Xakobyanga qarshi bo‘ladi.

Bugun Abdusattorov va Sindarov 12-turda o‘zaro to‘qnash kelib, durang qayd etishganini ta’kidlash lozim.

Erkaklar musobaqasida jami 19 ta tur o‘tkaziladi va eng yaxshi natija qayd etgan 4 shaxmatchi medallar uchun kurashda ishtirok etadi: yarim final va final.

Ayollar turnirida esa 15 ta turdan keyin 4 shaxmatchi chempionlik va sovrinli o‘rinlar uchun kurash olib boradi.