Халқаро футбол тарихи ва статистикаси федерацияси (IFFHS) Ўзбекистон футбол терма жамоасининг собиқ бош мураббийи Тимур Кападзени 2025 йилнинг дунёдаги энг яхши мураббийларидан бири деб эътироф этди.
Йил якунларига кўра, IFFHS миллий терма жамоаларнинг энг яхши мураббийлари рейтингини эълон қилди. Унда Тимур Кападзе 10 очко жамғариб, саккизинчи ўринни эгаллади ва энг яхши ўнликка кирди.
Рейтингда биринчи ўринни Испания терма жамоаси бош мураббийи Луис де ла Фуэнте қўлга киритди. Иккинчи ва учинчи поғоналардан мос равишда Португалия терма жамоаси мураббийи Роберто Мартинес ҳамда Аргентина терма жамоаси бош мураббийи Лионель Скалони жой олди. Шунингдек, топ-10 таликдан Норвегия, Англия, Франция, Марокаш ва Мексика терма жамоалари мураббийлари ҳам ўрин олган.
2025 йил январидан ноябрь ойигача у Ўзбекистон миллий терма жамоаси бош мураббийи лавозимида ишлади. У миллий жамоанинг собиқ бош мураббийи Сречко Катанецнинг ишини давом эттирган ҳолда Ўзбекистонни жаҳон чемпионатига олиб чиқди.
Айни пайтда Тимур Кападзе Наманганнинг «Навбахор» футбол клуби бош мураббийи ҳисобланади.
| Ўрин | Исм | Фуқаролиги | Миллий жамоа | Очколар |
|---|---|---|---|---|
| 1 | Луис де ла Фуэнте | Испания | Испания | 136 |
| 2 | Роберто Мартинес | Испания | Португалия | 83 |
| 3 | Лионель Скалони | Аргентина | Аргентина | 59 |
| 4 | Столе Солбаккен | Норвегия | Норвегия | 48 |
| 5 | Томас Тухель | Германия | Англия | 41 |
| 6 | Дидье Дешам | Франция | Франция | 30 |
| 7 | Волид Реграги | Марокаш | Марокаш | 25 |
| 8 | Тимур Кападзе | Ўзбекистон | Ўзбекистон | 10 |
| 9 | Нестор Лоренсо | Аргентина | Колумбия | 10 |
| 10 | Хавьер Агирре | Мексика | Мексика | 8 |
