Миланнинг "Интер" клуби "Ал-Ҳилол"нинг ўнг қанот ҳимоячиси Жоау Канселу трансфери устида иш олиб бормоқда.

Турли нуфузли манбаларга кўра, португалиялик январь ойида Саудия Арабистонини тарк этиб, Европага қайтмоқчи. Айни пайтда 31 ёшли футболчи учун асосий даъвогар сифатида "Интер" кўрилмоқда ва у ижарани амалга оширишни режалаштирмоқда. Журналист Паскуале Гуарронинг ёзишича, "нерадзуррилар" раҳбарияти Канселунинг мураккаб феъл-атвори ва хатти-ҳаракатларидаги муаммоларни жуда яхши билади, аммо бу борада ташвишланмайди ва шу сабабларга кўра келишувдан воз кечмайди. Милан гранди бош мураббийи Кристиан Киву футболчи истеъдодининг катта мухлисидир.

Жоау Канселунинг Transfermarkt порталидаги нархи - 10 млн евро. Ҳимоячи "Интер" билан аллақачон таниш: у 2017 йилдан 2018 йилгача ижара асосида жамоа шарафини ҳимоя қилган.