«Милан» ярим ҳимоячиси Лука Модрич жамоа бош мураббийи Массимилиано Аллегри билан муносабатлари ҳақида сўзлаб берди.

«Аллегрида ажойиб характер бор. У Анчелоттига бир оз ўхшайди — ҳиссиётли, қувноқ ва ҳазил қилишни яхши кўради. Аммо майдонда, мураббий сифатида у ҳақиқий устоз. Футболни кам сонли мутахассислардек чуқур тушунади. Илгари у билан унчалик яқин таниш эмас эдим, лекин ҳозир унинг менинг мураббийим эканидан хурсандман.

Анчелотти ҳақида гапирсам? Карло — биринчи рақамли мураббий, буни сўз билан ифодалаш қийин. Фақат захира ўриндиғидаги сифатлари эмас, балки ўзини тутиши билан ҳам ажралиб туради. Биз «Реал»да бирга бўлган пайтларимизда «Милан» ва шаҳар ҳақида кўп гаплашганмиз. Бу жой у учун ҳам алоҳида аҳамиятга эга эди.

Биринчи танишганимиз ёдимда. Мен шаҳарда ёлғиз эдим, у қўнғироқ қилиб, бирга кечки овқатланишни таклиф қилди. Биз соатлаб турли мавзуларда суҳбатлашдик — футбол, оила, ҳаёт ҳақида. Одатда мураббийлар ўз футболчиларига унчалик ишонмайди. Аммо у ишонади», — дея Модричнинг сўзларини Corriere della Sera нашри келтиради.