АҚШ 2026-йилги футбол бўйича Жаҳон чемпионати вақтида учувчисиз учиш аппаратларига (дрон) қарши чоралар кўриш учун 250 млн доллар ажратди.

АҚШ Фавқулодда вазиятлар бўйича федерал агентлигининг (FEMA) маълум қилишича, Вашингтон маъмурияти Жаҳон чемпионати ўйинлари ўтказиладиган 11 штат ҳамда пойтахт ҳудудига 250 млн доллар йўналтирган. Ушбу маблағлар дронларни аниқлаш, идентификация қилиш, кузатиш ва уларга қарши курашиш имкониятларини ривожлантириш учун ишлатилиши мумкин.

Агентлик вакилларининг таъкидлашича, сўнгги йилларда жиноятчилар, террорчилар ва АҚШга нисбатан душманона кайфиятдаги хорижий тузилмалар дронлардан тобора фаолроқ фойдаланмоқда.

“Биз дронлар билан боғлиқ хавф ортиб бораётганини инобатга олиб, Жаҳон чемпионати хавфсизлигини таъминлаш учун тезкор ҳаракат қилиш зарурлигини тушундик ва айнан шуни амалга оширдик”, деди агентлик вакили.

Қайд этилишича, 2026-йилда ҳам штатларга дронларга қарши чоралар учун яна 250 млн доллар ажратилиши режалаштирилган.

2026-йилги футбол бўйича Жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Турнирда илк бор 48 та терма жамоа иштирок этади. Жумладан, Ўзбекистон терма жамоаси ҳам ўз тарихида илк марта мундиалда қатнашади.

Фабио Каннаваро бошчилигидаги жамоа “K” гуруҳида Португалия, Колумбия ҳамда плей-офф ғолибига (Ямайка, Конго ҳамда Янги Каледония) қарши майдонга тушади. Учрашувлар Мексика ҳамда АҚШ ҳудудида бўлиб ўтади.