«Барселона» ва Бразилия терма жамоаси собиқ футболчиси Дани Алвес Португалия учинчи дивизионида қатнашувчи «Сан-Жуан-де-Вер» футбол клубининг янги инвестори бўлди. Алвес клубнинг 50% акциясини сотиб олган ва 2025/2026 мавсуми охирига қадар тўлиқ сотиб олиш бўйича келишувга эришди. Бу ҳақда TyC Sports хабар қилмоқда.
Маъмурий фаолиятдан ташқари, собиқ ҳимоячи маълум муддатга профессионал футболга қайтиш имкониятини ҳам кўриб чиқмоқда.
Футболчи 2023 йилдан бери майдонга тушмаган, бу вақтда Испанияда жинсий зўравонлик айблови билан қўлга олинган эди. Иш бир йилдан зиёд давом этган ва футболчи ҳибсда бўлган, 2024 йилда эса у тўрт ярим йил озодликдан маҳрум қилиш жазосига маҳкум қилинган эди. 2025 йилда суд айблов ҳужжатлари етарли бўлмагани сабабли жазони бекор қилган.
Дани Алвес «Барселона» сафида олти марта Испания чемпионлигини, уч марта Чемпионлар лигасида ғалаба қозонган, «Севилья» билан икки марта УЕФА кубогини қўлга киритган. Шунингдек, у «ПСЖ» сафида икки марта Франция чемпионлигини қўлга киритган.













