«Barselona» va Braziliya terma jamoasi sobiq futbolchisi Dani Alves Portugaliya uchinchi divizionida qatnashuvchi «San-Juan-de-Ver» futbol klubining yangi investori bo‘ldi. Alves klubning 50% aksiyasini sotib olgan va 2025/2026 mavsumi oxiriga qadar to‘liq sotib olish bo‘yicha kelishuvga erishdi. Bu haqda TyC Sports xabar qilmoqda.
Ma’muriy faoliyatdan tashqari, sobiq himoyachi ma’lum muddatga professional futbolga qaytish imkoniyatini ham ko‘rib chiqmoqda.
Futbolchi 2023 yildan beri maydonga tushmagan, bu vaqtda Ispaniyada jinsiy zo‘ravonlik ayblovi bilan qo‘lga olingan edi. Ish bir yildan ziyod davom etgan va futbolchi hibsda bo‘lgan, 2024 yilda esa u to‘rt yarim yil ozodlikdan mahrum qilish jazosiga mahkum qilingan edi. 2025 yilda sud ayblov hujjatlari yetarli bo‘lmagani sababli jazoni bekor qilgan.
Dani Alves «Barselona» safida olti marta Ispaniya chempionligini, uch marta Chempionlar ligasida g‘alaba qozongan, «Sevilya» bilan ikki marta UYEFA kubogini qo‘lga kiritgan. Shuningdek, u «PSJ» safida ikki marta Fransiya chempionligini qo‘lga kiritgan.













